國際天文聯會（港台譯名，大陸、新加坡譯國際天文學聯合會；英語：International Astronomical Union，IAU）於1919年7月喺比利時布魯塞爾成立，由當時嘅國際天文星圖計畫（Carte du Ciel）、太陽天文聯合會（Solar Union）同埋國際時間局（Bureau International de l'Heure）等幾個組織合併而成。其後，世界各國嘅國家級天文組織陸續加入，構成今日嘅規模。該會係國際科學理事會（ICSU）嘅國際科學聯合成員，亦係國際上承認嘅權威機構，負責統合恆星、小行星、衛星、彗星等新天體以及天文學名詞嘅定義及英文命名。
IAU下面分成幾個工作單位，其中行星科學命名委員會（Working Group on Planetary Science Nomenclature，WGPSN），負責制定及維護天體命名規則公約同埋行星系嘅命名。IAU亦負責天文訊息全球電報通報系統，實際工作由中央天文電報局（Central Bureau for Astronomical Telegrams，CBAT）總整天文訊息嘅匯報及電報嘅發布。小行星中心（Minor Planet Center， MPC）負責喺太陽系裏面小行星、衛星以外嘅天體資訊交流，亦喺IAU下操作。
截至2006年9月1日，總會共有85個不同國家或地區共8859位會員，美國有2417位會員，法國為625位，英國為573位而日本就有504位；中國大陸（南京）292位而中華台北則有30位會員。