泛聯盟(The Alliance)，係香港立法會一個議員政治結盟，之前叫早餐派（因為佢哋嘅議員都通常響食早餐時討論政事而得名）。2004年第三屆立法會成立後，成員陳智思、呂明華、石禮謙、何鍾泰，連同首次晉身立法會嘅劉秀成決定重組組織，重改叫「泛聯盟」，務求掃除早餐派以往嘅「保皇」形象，以及爭取響立法會取得「關鍵少數」嘅作用。泛聯盟秘書長係石禮謙。
泛聯盟響立法會唔係一個政黨，成員都係無黨派背景。組織只係某幾位議員響政見上嘅一個結盟，而對各議員嘅投票意向都無約束力。
泛聯盟議員雖然表明佢哋唔係親政府派，亦唔係民主派，而係會企喺香港整體利益嘅立場審議各項政策。不過，佢哋嘅政治立場其實傾向親政府，而自從成員陳智思獲政府委任為行政會議成員後，泛聯盟已表明全力支持政府施政，而對政府政策亦甚少投反對票。